മൃഗങ്ങള്‍ പുറത്തും സന്ദര്‍ശകര്‍ കൂട്ടിലുമായി ഒരപൂര്‍വ്വ മൃഗശാല
മനുഷ്യര്‍ക്കുള്ളതുപോലെത്തന്നെ മറ്റുജീവജാലങ്ങള്‍ക്കും സ്വാതനന്ത്ര്യത്തോടെ ജീവിക്കാനുള്ള അവകാശമുണ്ടെന്ന് പറയാറുണ്ടെങ്കിലും അതിന് മാതൃകതീര്‍ത്തിരിക്കുകയാണ് ചൈനയിലെ ലെഹി ലേദു വന്യമൃഗസങ്കേതം. അവിടെകാണാനെത്തുന്നവര്‍ക്ക് സുരക്ഷിതമായ വാഹനക്കൂടുകളില്‍ വന്യമൃഗങ്ങള്‍ യഥേഷ്ടം വാഴുന്ന കൊടുംകാട്ടിലൂടെ സഞ്ചരിച്ച് അത്യപൂര്‍വ്വ മൃഗക്കാഴ്ചകള്‍ ആസ്വദിക്കാം. ലോകത്തുള്ള മറ്റു മൃഗശാലകളില്‍നിന്നും തീര്‍ത്തും വ്യത്യസ്തമാണ് ഇവിടത്തെയനുഭവം. മൃഗങ്ങളെ വാഹനത്തിനടുത്തേക്ക് ആകര്‍ഷിക്കാനായി വാഹനത്തിനു പുറത്തായി ഇറച്ചിയും മറ്റു ഭക്ഷണവിഭവങ്ങളും കെട്ടിത്തൂക്കിയിടും.
സിംഹവും പുലിയും മറ്റും ഇരയുടെ മേലേക്ക് ആര്‍ത്തിയോടെ കുതിച്ചു ചാടിയടുക്കുന്നതിന്‍റെ നേരനുഭവങ്ങള്‍ കാണാന്‍ ലോകത്തിന്‍റെ വിവിധ ഭാഗങ്ങളില്‍നിന്നും സന്ദര്‍ശകരെത്തുന്നു. വന്‍ തിരക്കാണിവിടെ. 2015-ല്‍ ഇത് തുടങ്ങിയപ്പോള്‍ ആദ്യമൂന്നുമാസത്തേക്കുള്ള ടിക്കറ്റുകള്‍ ഇദ്ഘാടനദിവസം തന്നെ തീര്‍ന്നുപോയി. ഇപ്പോഴും ഈ തിരക്ക് തുടരുന്നു. ഇവിടെ നമ്മള്‍ മൃഗങ്ങളെയല്ല മൃഗങ്ങള്‍ നമ്മളെയാണ് കാണുന്നത്. അത്ഭുതത്തോടെ, പ്രതീക്ഷയോടെ നോക്കുന്നത്. ശരിയ്ക്കും പരമ്പരാഗത മൃഗശാല സങ്കല്‍പ്പത്തെ തല തരിച്ചിട്ടിരിക്കുകയാണ് മറ്റു പലതിലുമെന്നപോലെ ഇതിലും ചൈനക്കാര്‍.
എന്നാല്‍ ഈ സാഹസത്തിനെതിരെ യൂറോപ്പില്‍നിന്നടക്കം വന്‍ വിമര്‍ശനങ്ങളും ഉയര്‍ന്നിട്ടുണ്ട്. ഏറെ അപകടം പിടിച്ചതാണ് ഈ വിനോദമെന്നാണ് അവരുടെ പക്ഷം.