ഉണ്ട കണ്ടാല്‍ ഉണ്ട തിന്നേണ്ടി വരുന്നകാലം
സര്‍ക്കാര്‍ എല്‍.പി സ്കൂളുകളില്‍നിന്നും മലയാളം മീഡിയം ഇല്ലാതായിക്കൊണ്ടിരിക്കുകയാണ്. രക്ഷിതാക്കള്‍ക്കും അധ്യാപകര്‍ക്കും പ്രിയം ഇംഗ്ലീഷിനോടാണ്. മലയാളത്തെ സ്നേഹിക്കുന്ന രക്ഷിതാക്കളും അധ്യാപകരും ഇല്ല എന്നല്ല പക്ഷെ അവരുടെ സ്പേസ് ചുരുങ്ങിവരികയാണ്. സ്കൂളുകളില്‍ ഇംഗ്ലീഷ് മീഡിയം തുടങ്ങുന്നതുമായി ബന്ധപ്പെട്ട് വളരെ ദുര്‍ബലമായ നിയമങ്ങളാണ് നിലവിലുള്ളത്, ഒന്നിനും ഒരു വ്യക്തതയില്ല എന്നതുതന്നെ കാരണം. രണ്ട് മലയാളം ക്ലാസ്സുകള്‍ക്ക് ഒരു ഇംഗ്ലീഷ് മീഡിയം തുടങ്ങാം എന്നാണ് സര്‍ക്കുലര്‍. രണ്ട് മലയാളമീഡിയത്തിന് ഒരു ഇംഗ്ലീഷ് മീഡിയമേ തുടങ്ങാവൂ എന്നു പ്രത്രേകം എടുത്തുപറയാത്തതുകൊണ്ടുതന്നെ ആ പഴുതുപയോഗിച്ച് തോന്നുംപോലെ കാര്യങ്ങള്‍ നടത്തുകയാണ് സ്കൂളധികൃതര്‍. ഉദാഹരണത്തിന് കാലിക്കറ്റ് സര്‍വ്വകലാശാല കാമ്പസ് എല്‍.പി.സ്കൂളില്‍നിന്നും നിലവില്‍ പുറത്തിറങ്ങിയ നാലാം ക്ലാസ്സിലെ നാലു ബാച്ചുകളില്‍ മൂന്നെണ്ണം ഇംഗ്ലീഷ് മീഡിയവും ഒരെണ്ണംമാത്രം മലയാളം മീഡിയവുമായിരുന്നു. ഇത്തവണ അത് രണ്ട് രണ്ട് എന്ന അനുപാതത്തിലാണ് ക്രമീകരിച്ചിട്ടുള്ളത്.
മിക്കസ്കൂളുകളും ഇംഗ്ലീഷ് മീഡിയത്തിനാണ് പ്രാധാന്യം നല്‍കി വരുന്നത്. സ്ഥിരാധ്യാപകരെ ഇംഗ്ലീഷ് മീഡിയത്തിനും താല്‍ക്കാലികാധ്യാപകരെ മലയാളമീഡിയത്തിനും എന്നതാണ് അവസ്ഥ. സര്‍ക്കാര്‍ സ്കൂളുകള്‍ ഏത് മീഡിയത്തിനാണ് പ്രാധാന്യം നല്‍കുന്നതെന്ന് ഇനിയെങ്കിലും വ്യക്തമാക്കേണ്ടിയിരിക്കുന്നു. ബോധനം മലയാളത്തിലാവണമെന്നാഗ്രഹിക്കുന്നവര്‍ക്ക് ആശ്രയിക്കാന്‍ വേറെ സ്കൂളുകളില്ല എന്നാല്‍ ഇംഗ്ലീഷ് പഠിപ്പിക്കണമെന്നാഗ്രഹിക്കുന്ന രക്ഷിതാക്കള്‍ക്ക് മക്കളെ വിടാന്‍ നാട്ടില്‍ ധാരാളം സാധ്യതകള്‍ ഉണ്ടെന്നിരിക്കെ സര്‍ക്കാര്‍ വിദ്യാലയങ്ങള്‍ മലയാളം മീഡിയത്തിന് പ്രാധാന്യം നല്‍കുന്ന നയം ഉടന്‍ പ്രഖ്യാപിക്കുകയും അതിനാവശ്യമായ നിയമനിര്‍മ്മാണം നടത്തുകയും വേണം. ഫീസുകൊടുക്കാതെ മധ്യവര്‍ഗ്ഗത്തിന് മക്കളെ ഇംഗ്ലീഷ് മീഡിയത്തില്‍ പഠിപ്പിക്കുവാനുള്ള ഇടമായി പൊതുവിദ്യാഭ്യാസത്തെ പാകപ്പെടുത്തുന്ന കാഴ്ചയാണ് എവിടെയും കാണുന്നത്. മലയാള ഭാഷാസ്നേഹസംഘടനകളും പരിഷത്പോലുള്ള ഇടപെടലുകാരെയും ഈയിടെയായി ഈവഴിക്കൊന്നും കാണുന്നില്ല.
സമീര്‍ കാവാഡ്