സമീര്‍ അമീന്‍, സോമനാഥ് ചാറ്റര്‍ജി: രണ്ട് അസാധാരണ മാര്‍ക്സിസ്റ്റുകള്‍
മാര്‍ക്സിസത്തിന്‍റെ വെളിച്ചത്തില്‍ ജീവിതത്തിന്‍റെ അര്‍ത്ഥം അന്വേഷിച്ച രണ്ട് മനുഷ്യര്‍, സമീര്‍ അമീനും, സോമനാഥ് ചാറ്റര്‍ജിയും അകലങ്ങളിലാണെങ്കിലും അടുത്തടുത്തായി മരണപ്പെട്ടിരിക്കുന്നു. ദേശസങ്കല്‍പം ഇവരെ സംബന്ധിച്ച് കേവലമായിരുന്നെങ്കിലും ഒരാള്‍ ഈജിപ്തുകാരനും മറ്റൊരാള്‍ ഇന്ത്യക്കാരനും ആയിരുന്നു എന്നു പറയാം. ടി.എന്‍.ശേഷന്‍ തെരഞ്ഞെടുപ്പ് കമ്മീഷണറായിരുന്നപ്പോഴാണ് ആ കസേരയുടെ വിലയറിഞ്ഞത് എന്ന പറച്ചില്‍ സോമനാഥ് ചാറ്റര്‍ജിയ്ക്കും നന്നായി ചേരും. അദ്ദേഹം ആ സീറ്റിലിരുന്ന കാലത്താണ് പാര്‍ലമെന്‍റിലെ കനപ്പെട്ടൊരു കസേരയാണ് സ്പീക്കറുടേത് എന്ന് വാസ്തവത്തില്‍ ഇന്ത്യക്കാര്‍ അറിഞ്ഞത്. അദ്ദേഹം സ്പീക്കറായിരുന്ന പതിനഞ്ചാം ലോകസഭയില്‍ അഞ്ച് വര്‍ഷക്കാലം ഒരു ചോദ്യം പോലും ഉന്നയിക്കാതെ അംഗങ്ങളായിരുന്ന എം.പി മാരെ രൂക്ഷമായ ഭാഷയില്‍ ചാറ്റര്‍ജി വിമര്‍ശിക്കുകയുണ്ടായി. ഇത്തരം മിണ്ടാചരക്കുകളെയല്ല ജനങ്ങള്‍ അവരുടെ പ്രതിനിധികളായി അയക്കാന്‍ ആഗ്രഹിച്ചിരിക്കുക എന്നദ്ദേഹം പാര്‍ലമെന്‍റ് മന്ദിരത്തില്‍ നിന്നുതന്നെ തുറന്നടിച്ചു. വെറും പാര്‍ട്ടിക്കാരന്‍ മാത്രമായിരുന്നില്ല സോമനാഥ്, അതുകൊണ്ടാണ് ഒടുവിലദ്ദേഹം സ്വയം ഒരു പാര്‍ട്ടിയായി മാറി എന്നു പാര്‍ട്ടിക്കാരില്‍ ചിലര്‍ക്കെങ്കിലും തോന്നിയത്. പാര്‍ലമെന്‍ററി പ്രവര്‍ത്തനത്തില്‍ നിന്നും ഒഴിഞ്ഞതോടെ സോമനാഥ് ചാറ്റര്‍ജിയെ നാം മറന്നു തുടങ്ങിയിരുന്നു. ഒടുവില്‍ മരണത്തിലൂടെ ഒരിക്കല്‍ക്കൂടി ഓര്‍മ്മിപ്പിച്ചുകൊണ്ട് അദ്ദേഹം വിടവാങ്ങിയിരിക്കുന്നു.
------------------
ടീം kavad.in
അന്താരാഷ്ട്ര പ്രശസ്തനായ മാര്‍ക്സിസ്റ്റ് സാമ്പത്തിക വിദഗ്ധനും ധൈഷണികനുമാണ് സമീര്‍ അമീന്‍. മാര്‍ക്സില്‍ നിന്നും സ്വാധീനം ഉള്‍ക്കൊണ്ട് പുതിയ കാലത്ത് മുതലാളിത്തത്തെ വിലയിരുത്താന്‍ ശ്രമിച്ച ചിന്തകനാണദ്ദേഹം. മുതലാളിത്തത്തിന്‍റെ ഗതിവിഗതികളെ വിലയിരുത്താന്‍ ലോകത്തെമ്പാടുമുള്ള റാഡിക്കല്‍ ലെഫ്റ്റിന് മാര്‍ഗനിര്‍ദ്ദേശം നല്‍കിക്കൊണ്ടേയിരുന്നു അവസാന നാളുകളില്‍പോലും അമീന്‍. എല്ലാത്തരം കുത്തകകള്‍ക്കും എതിരായ കുത്തകവിരുദ്ധ സാമൂഹിക സംഘങ്ങള്‍ക്ക് രൂപം നല്‍കേണ്ടതിന്‍റെ ആവശ്യകത പുതിയ കാലത്തെ ചൂഷണക്രമത്തെ വിലയിരുത്തി അദ്ദേഹം ഊന്നിപ്പറഞ്ഞു. ഇന്നത്തെ നിലയിലുള്ള മുതലാളിത്തത്തിന്‍റെ തുടര്‍ച്ച ബാര്‍ബേറിസത്തിലേ അവസാനിക്കൂ എന്ന മുന്നറിയിപ്പും അമീന്‍ നല്‍കുന്നു. ഇന്നു ലോകത്തിന്‍റെ വിവിധ ഭാഗങ്ങളിലുള്ള മുഖ്യധാരാ ഇടതുപക്ഷത്തിന്‍റെ മുതലാളിത്ത ബദലുകളില്‍ കാണുന്ന ദൗര്‍ബല്യത്തെ അദ്ദേഹം തുറന്നു കാട്ടി. നിലനില്‍ക്കുന്ന വ്യവസ്ഥയുടെ ഭീകരയാഥാര്‍ഥ്യം ഒളിച്ചുവെച്ച് പുറമെക്ക് അവര്‍തന്നെ ബോധപൂര്‍വ്വം പ്രകടിപ്പിക്കുന്ന ചില അവസ്ഥകളോട് അഡ്ജസ്റ്റ്മെന്‍റ് സമരങ്ങളുമായി സഹകരിക്കുകയാണ് അവര്‍ ചെയ്യുന്നതെന്നും അദ്ദേഹം ചൂണ്ടിക്കാണിക്കുന്നു. മുതലാളിത്തത്തെ തകര്‍ക്കാനുള്ള മാത്രികവടി നിര്‍ദ്ദേശിച്ച ചിന്തകനായല്ല മറിച്ച് ഉത്തരാധുനികകാല മുതലാളിത്തത്തിന്‍റെ പുഴുക്കുത്തുകളെ കാര്യകാരണസഹിതം വിശദീകരിക്കാന്‍ ശ്രമിച്ച ദീര്‍ഘദര്‍ശി എന്ന നിലയിലാവും സമീര്‍ അമീന്‍ ചരിത്രത്തില്‍ അറിയപ്പെടുക.
വിട്ടുപിരിഞ്ഞ വിപ്ലവകാരികളെ അത്ഭുതത്തോടെ ഓര്‍ക്കുന്നു.
------------------
ടീം kavad.in