ആദ്യനോവലിന്‍റെ നഷ്ടപ്പെട്ട അധ്യായം ജപ്പാനില്‍ കണ്ടുകിട്ടി
പുരാതന കാലംമുതല്‍ പേരുകേട്ട ജാപ്പനീസ് ആഖ്യാനമായ ദ റ്റെയില്‍ ഓഫ് ഗെഞ്ചി എന്ന നോവലിലെ 54 അധ്യായങ്ങളില്‍ ഒന്നാണിത്. പതിനൊന്നാം നൂറ്റാണ്ടില്‍ മുറസാക്കി ഷിക്കിബു പ്രഭുവാണ് ഇതിന്‍റെ ആദ്യ കയ്യെഴുത്ത് പ്രതി തയ്യാറാക്കിയത്. കവി ഫ്യൂജിവാര ന തെയ്ക ഇത് പിന്നീട് നാലു വാള്യങ്ങളിലായി ക്രോഡീകരിച്ചു. അതില്‍ മൂന്നെണ്ണം ജപ്പാനിലെ സാംസ്കാരിക വകുപ്പിന്‍റെ സംരക്ഷണത്തിലുണ്ട്. നഷ്ടപ്പെട്ടു എന്നു കരുതിയിരുന്ന വാള്യമാണിപ്പോള്‍ ജപ്പാനിലെ ഒരു വീട്ടിലെ പത്തായത്തില്‍നിന്നും വെളിച്ചത്തുവന്നിരിക്കുന്നത്. 18കാരനായ ഹികാറു ഗെഞ്ചി എന്ന ജാപ്പനീസ് രാജകുമാരന്‍റെ സങ്കീര്‍ണ്ണവും സംഘര്‍ഷാത്മകവുമായ ജീവിതമാണ് ഹയാന്‍ ഭരണകാലത്ത് രചിക്കപ്പെട്ട ഈ ഇതിഹാസത്തിന്‍റെ പ്രമേയം.
ഇപ്പോള്‍ കണ്ടുകിട്ടിയ വാള്യത്തില്‍ ഗെഞ്ചി രാജകുമാരനും ഭാവിഭാര്യ മുറസാകിയും തമ്മിലുള്ള സമാഗമ വിശേഷങ്ങളാണ്. ജപ്പാനിലെ പ്രഭുകുടുംബത്തില്‍പെട്ട മൊട്ടഫൂയൂ ഒകാച്ചി എന്ന 72-കാരന്‍റെ ഭവനത്തില്‍നിന്നാണ് ഇത് ലഭിച്ചിരിക്കുന്നത്. 1743-ല്‍ ഇതവരുടെ തറവാട്ടിലെത്തിലേക്ക് മറ്റൊരു കുടുംബത്തില്‍നിന്നും ലഭിക്കുന്നത്.
വ്യക്തിജീവിതവും ഔദ്യോഗികജീവിതവും (രാജഭരണം) ഒരുമിച്ചു തുഴയാന്‍ പെടാപ്പാടുപെടുന്ന രാജകുമാരന്‍റെ യത്നം വായനക്കാര്‍ക്ക് അക്കാലത്തെ ജാപ്പനീസ് ഭരണവ്യവസ്ഥയിലേക്കും ജീവിതചുറ്റുപാടുകളിലേക്കുമുള്ള കൗതുകകരമായ ഉള്‍ക്കാഴ്ച നല്‍കുന്നു. അക്കാലത്തെ ജപ്പാന്‍റെ ലൈംഗിക രാഷ്ട്രീയവും അതിലൂടെ അനാവരണം ചെയ്യുന്നു. നിരവധി ഇംഗ്ലീഷ് വിവര്‍ത്തനങ്ങള്‍ ഉണ്ടായിട്ടുണ്ട്, 2015-ല്‍ ഡെന്നിസ് വാഷ്ബേണ്‍ തയ്യാറാക്കിയ 1300 പുറങ്ങളുള്ള വിവര്‍ത്തനമാണ് ഏറ്റവും ഒടുവിലത്തേത്. ജാപ്പനീസ് സാംസ്കാരിക വകുപ്പ് കൃതിയുടെ ആധികാരികത ശാസ്ത്രീയ പരിശോധനയിലൂടെ ഉറപ്പുവരുത്തിയിട്ടുണ്ട്. രാഷ്ട്രത്തിന്‍റെ പൈതൃകസ്വത്തായി ഇതിനെ സംരക്ഷിക്കുമെന്നും പഠനഗവേഷണങ്ങള്‍ക്കായി ഉടന്‍ അവസരമൊരുക്കുമെന്നും സര്‍ക്കാര്‍ അറിയിച്ചു.