യൂറോ കപ്പില്‍ കോര്‍ട്ടറിനു മുമ്പെ പോര്‍ച്ചുഗല്‍ പുറത്തായെങ്കിലും ഗോള്‍ഡന്‍ ബൂട്ട് നേടാന്‍ ഇപ്പോഴും സാധ്യത ക്രിസ്റ്റ്യാനോ റോണാള്‍ഡോയ്ക്കു തന്നെ. ഗ്രൂപ് മത്സരങ്ങളില്‍ ഹംഗറിക്കും ഫ്രാന്‍സിനുമെതിരെ ഈരണ്ടു ഗോളുകളും ജര്‍മ്മനിക്കെതിരെ ഒരു ഗോളുമടക്കം അഞ്ചുഗോളുകളുമായി ഈ ഏഴാം നമ്പറുകാരന്‍തന്നെയാണ് ഇപ്പോഴും മുന്നില്‍. ചെക്ക് റിപ്പബ്ലിക്കിന്‍റെ പാട്രിക് ഷിക്കും അഞ്ചുഗോളടിച്ചിട്ടുണ്ടെങ്കിലും ഡിയാഗോ ജോട്ട നേടിയ ഗോളിന് അസിസ്റ്റ് നല്‍കി എന്ന അഡ്വന്‍റേജ് ഈ യുവന്‍റസ് താരത്തിനുണ്ട്. ഇംഗ്ലണ്ടിന്‍റെ റഹീം സ്റ്റെര്‍ലിംഗ്, ഹാരി കെയിന്‍ എന്നിവരും ഡെന്‍മാര്‍ക്കിന്‍റെ കാസ്പര്‍ ഡോള്‍ബര്‍ഗും മൂന്നു ഗോളുകള്‍ വീതം അടിച്ച് ഇനിയും മത്സരങ്ങള്‍ അവശേഷിക്കുന്ന ഗോള്‍ഡന്‍ബൂട്ട് സാധ്യത കല്‍പ്പിക്കുന്ന കളിക്കാരായുണ്ട്. ലോകഫുട്ബോളറടക്കം മറ്റ് നിരവധി അവാര്‍ഡുകള്‍ നേടിയിട്ടുണ്ടെങ്കിലും യൂറോ ഗോള്‍ഡന്‍ബൂട്ട് ഇതുവരെ ക്രിസ്റ്റ്യാനോയ്ക്ക് നേടാനായിട്ടില്ല.
